Mga Panumduman Sa Akong Pagka'batan'on

Athena Garcia

Kani- adto,
Kami pa ang gagmatoy
Magduwa'g dakpanay, julinay,
Ug tumba lata sa kadalanan sa Cogon;
Kami ni Laklak, Deo, Wowie...
Ug usahay mo-apil
Si Woody ug si Bolantoy.

Mahinumduman ko ang kalipay
Nga akong mabati
Kun kami mangikyas na gani
Paingon sa baybayon sa Kaingit
Unya dayon ang kakulba
Sa dihang may usa kanamo
Ang nadakin-as, napangus,
Ug naputos sa lumot.

Mahinumdum ko
Nga ang tambal sa panuhot
Mao gayud ang hilot
Ni Boss Intong.

Mahinumdum ko
Sa panagsang trapik
Sa kadalanan
Kon mo-agi na gani
Ang gamhanang dyip ni Hoc Sing,
Sa pagkagubot sa katawhan
Kay diryo na 'sab maugdaw ang Agora,
Og sa mga hungihong
Kung nganong mingtumaw pag usab
Ang bulahang baksan sa merkado's Cogon.

Karon kaning tanan
Kutob na lang intawn sa dumdum
Kay ningpanaw na si anhing Hoc sing,
Og si Ong Guat, og si Ang Hong, og si Teh Sing.

Nahanaw na ang Agora,
Lakip na ang skiesdilimit.
Og kung sa ICM, di ka madakin-as,
Mapangus, ug maputos sa lumot,
May mangikyas pa kaha
Padu'ong sa Kaingit?